கவிஞன் விஞ்ஞானியானால்..!!!

==பூமி==

இருபத்தி மூன்றரை
சாய்வு கோணத்தில்
பரதமாடும் பெண்...!!!

பரதத்தின் பாத சுவடுகள்
நீள்வட்ட கோலம்..!!!


==நிலா==

சுழல் ஆணியின்றி
அந்தரத்தில்
சுழலும் பம்பரம்..!!!

கதிரவனின் கதிரொளியை
குளிர்விக்கும்
கோல குளிர்விப்பான்..!!!

தினகரனை பூமிக்கு
எதிரொளிக்கும்
பாதரச கண்ணாடி ..!!!

==வானம்==

கணக்கில்லா உயிர்கோலங்களை
உள்ளடக்கிய
எல்லையில்லா அமேசான் காடு..!!!

பகலவன் ஒளிக் கீற்றில்
வேய்ந்த
நீலக் கற்பனைக் கூரை ...!!!

ராகத்தோடு பூமியின் தாகம்
தணிக்கும்
மேகக் குடங்களின் தோட்டம் ...!!!

==வானவில்==

திரவ தேகத்தை சிதைத்து
கார்மேகமது
சிந்துகிறது திரவ முத்தை..!!!

பரிதியவன் பார்வை
திரவ மேனியில் தெறித்து
ஏழு வண்ண வட்டமானது ..!!!

==கடல்==

பூமகள் உடலில்
படர்ந்துள்ள
உவர்ப்பு நீர்படலம்..!!!

அறிவியல் அறியாத
உயிர்களின்
அதிசய உலகம்..!!!

சரித்திரத்தை கரைத்து
கரையாத
சரித்திரமான கரைப்பான்..!!!


==அணுக்கரு பிளவு==

கவிஞனின் கற்பனைப் போல
துகளொன்று இரண்டாகிறது
இரண்டு நான்காகி எட்டாகி
.
.
.
தொடர்கிறது முடிவிலியாக

கட்டுபடுத்தினால்
அணு உலையெனும் கவிதை
கட்டுபடுத்தாவிட்டால்
வெடி குண்டெனும் அழிவு ..!!!!

---இது ஒரு கற்பனை---

என் மழைத் தோழியுடன்..!!!

நேற்று
ஊரெங்கும் கதவடைப்பு
தென்றலது ஜன்னலை தட்டிட
எட்டி பார்த்தேன் ...!!!!

என் தோழியவள்
விண்ணுலக தேவதை
மண்ணுலகம் வந்திருந்தாள்..!!!

மகிழ்ச்சியில் மயிலாகி
தோகை விரித்து ஆடினேன்
ஆனந்தத்தில்
அகவை குறைந்தது கணிசமாக
பத்து வயது
பட்டாம் பூச்சியானேன்..!!!

சிறகடித்து
கட்டியணைத்தேன் நெஞ்சோடு
அள்ளி முத்தமிட்டேன்
அவளின் கோள உடலெங்கும்..!!!

தொட்டால் சிதைந்து போகும்
பளிங்கும் மேனி பாவையவள்
பிரம்மன் படைக்காத அதிசயமே..!!!

வானுக்கும் பூமிக்கும்
நீர் பாலமமைத்து
நிலமகளை நீராட்ட வந்த
திரவ தேக முத்தவள்...!!!


பயண களைப்பிலே
படுத்துறங்கினாள்
பூமகளின் மடியிலே..!!!

நொடியில் துயில் கலைத்து
புறப்பட்டாள்
கொஞ்சம் ஓய்வெடு என்றேன்..!!!

ஓய்வா ..?? எனக்கா..??

நான்
வீட்டிலே அடைந்து கிடக்க
பூலோக கன்னியுமல்ல
படுக்கையிலே படுத்து கிடக்க
பொறுப்பில்லா பாலகனுமல்ல

படி தாண்டி வா என்னோடு
கடமைகள்
மலையாய் குவிந்துள்ளதென்று
கனத்த குரலில்
கன்னத்தில் அறைந்தாள் ..!!!

புறப்பட்டேன் அவளோடு...

வழியில் நின்ற தடைகளை
உளியின்றி உடைத்து
தன்னோடு கட்டியிழுத்து
சீறிப் பாய்ந்தோடினாள்..!!!

மனித கிருமிகளால்
தாவரங்களுக்கு இரத்தசோகை
வேர்களில் ரத்தமாய் பாய்ந்து
நோய் தீர்த்தாள்...!!!

வெட்டிய மரத்தின்
உயிரில்லா விதைகளுக்கு
தன்னை மண்ணில் மரித்து
உயிர் கொடுத்தாள் ...!!!

குளம் குட்டைகளில் நிரம்பி
பாலையான விவசாயின்
கண்களை சோலையாக்கினாள்...!!!

கட்டியிழுத்து வந்ததை
தங்க துகளாக்கி
கரையெங்கும் தூவி
கடல் அன்னையோடு கலந்தாள்..!!!

கடமை முடியவில்லை
மேக கன்னிகளோடு
மீண்டும் வருவேனென்று

பரிதியின் பார்வையிலே
உடன்கட்டை ஏறி
ஆவியாகி பறந்தாள்..!!!

கடற்கரையில் தனி மரமாய்
நின்றிருந்தேன்
தோழியவளின் வருகைக்காக..!!

------ சுதா -------

கும்மி பாட்டு புதுசு..!!!!

கும்மியடி பெண்ணே கும்மியடி
தமிழிலோர் பாட்டு பாடி
கும்மியடி பெண்ணே கும்மியடி ..!!!

சித்திரையும் பொறந்ததடி
சின்ன புள்ள தலையில
ஆங்கில உஷ்ணமும் ஏறுதடி
தணிக்க தமிழிலோர் பாட்டெழுதி
கும்மியடி பெண்ணே கும்மியடி ..!!!

வைகாசி வைபோகமும் காணலடி
விலைவாசியும் ஏறுதடி
வீடாகும் விளைநிலத்தை காத்து
விவசாயத்தை வளர்ப்போமென
கும்மியடி பெண்ணே கும்மியடி ..!!!

ஆனியில ஊத காத்தும் வீசலடி
உச்சி வெயிலும் தணியலடி
ஊரோரம்
மரமொன்ன நடுவோமென
கும்மியடி பெண்ணே கும்மியடி ..!!!

ஆடிப்பட்டம் வந்ததடி
அரசியல் வெள்ளமும் ஓடுதடி
அதிலே
நல்லதொரு ஆட்சியை விதைத்போமென
கும்மியடி பெண்ணே கும்மியடி ..!!!

ஆவணி பொறந்ததடி
பொன்னு விளையும் பூமியிலே
நட்ட நாத்தெல்லாம் சாகுதடி
செயற்கையை அழித்து
மண்ணோட மாசு நீக்குவோமென
கும்மியடி பெண்ணே கும்மியடி ..!!!

புரட்டாசி விரதமெல்லாம் துரிதமாக
துரித உணவோடு முடியுதடி
அகமும் புறமும் பக்குவமாக
மாதமொரு விரதமெடுத்து
கும்மியடி பெண்ணே கும்மியடி ..!!!

ஐப்பசி அடைமழையும் பொழியலடி
பொழிந்தாலும் வீணாக போகுதடி
சேகரிக்க குளமொன்ன வெட்டி
கும்மியடி பெண்ணே கும்மியடி ..!!!

இல்லத்தில் இன்பம் பொங்கிட
கார்த்திகையில்
வீடெங்கும் விளக்கேற்றி
கும்மியடி பெண்ணே கும்மியடி ..!!!

மார்கழியில்
மணி எட்டு வரை தூங்காதீர்
ஆயுளை நீட்டிட
ஆதவனுக்கு முன்யெழுந்து
அழகு கோலமிட்டு
கும்மியடி பெண்ணே கும்மியடி ..!!!

தை பிறந்தும்
தமிழினத்துக்கு வழி பிறக்கலடி
போராட
தமிழர்களை ஒன்று திரட்டி
கும்மியடி பெண்ணே கும்மியடி ..!!!

மாசியில் மாலையிட்டு
மறுநாளே விவாகரத்து கேக்காதிங்க
மனம் விட்டு பேசி
மகிழ்ச்சியாக வாழ்வோமென்று
கும்மியடி பெண்ணே கும்மியடி ..!!!

பங்குனியில்
பழந் தமிழ் பண்பாட்டிலே
ஊரெங்கும் விழாயெடுத்து
தெருவெங்கும் தேரோட்டி

கும்மியடி பெண்ணே கும்மியடி
தமிழிலோர் பாட்டு பாடி
கும்மியடி பெண்ணே கும்மியடி ..!!!

---sutha----

கவிஞர்களே ஊன்றுவோம் விதையொன்றை..!!!

புலவர்களே புலவர்களே

ஒன்றுகூடி எழுப்புங்கள்
எழுத்திலோர்
ஓலைக் குடிசையை...!!!

தமிழனில்லை தமிழகத்தில்
தமிழன்னையும்  தமிழினமும்
நிழலின்றி அலைகிறது ..!!!


கவிஞர்களே கவிஞர்களே

கவிதையிலே கண்டறியுங்கள்
நவீன
பாதுகாப்பு ஆயுதமொன்றை ...!!!

அரசியல் நரிகள் ஊளையிடுகிறது 
பயந்து
நடுங்குகிறாள் பாரதத்தாய் ..!!!


கவித் தோழிகளே தோழிகளே

கவி ஏடுகளை இணைத்து
ஆடையொன்றை
கச்சிதமாய் தைத்திடுங்கள்

அயலார்  கலாச்சாரத்தில்
தமிழர்களின்
அங்கம் தெரிகிறது !!!


கவித் தோழர்களே தோழர்களே

கவிக்கோலை தூண்டு கோலாக்கி
கவி வரிகளை
தீயதை தீய்க்கும் நெய்யாக்குங்கள்...!!l

தேசத் தீபங்கலெல்லாம்  
போதை இருளில்
ஆனந்தமாக உறங்குகிறது...!!!


எழுத்தாளர்களே எழுத்தாளர்களே

எழுதுகோலின் மையிலே
மகத்தான மருந்தொன்றை
உருவாக்குங்கள்...!!!

செயற்கையெனும் கிருமிகளால்
இயற்க்கையன்னை
நோயுற்று இன்னல்படுகிறாள்..!!!


கவித் தோழர்களே தோழிகளே

ஊன்றுவோம் ஊன்றுவோம்
நாளும்
நற்க் கருவொன்றை ஊன்றுவோம்...!!!

நாளை
விருட்சமாகி தோப்பாகி
தூய்மைப்  படுத்தட்டும்
மாசடைந்த மானுடத்தை  !!!

---Sutha---

பூவும் பெண்ணும் !!!

பெண் பூவே
நீ

அழகிலே ஆம்பல்
முல்லை முகமானவள்
காந்தள் கண்கள்
வள்ளி விழிகள் !!

புருவம் பசும்பிடி
கருவிள கன்னம்
பாதிரிப் பார்வை
செருந்தி செவ்விதழ் !!

நெய்தல் நெற்றி
தாழை தாடை
மாம்பூ மூக்கு
பற்கள் பயினி !!

செங்கொடுவேரி செவி
நாக்கு நறவம்
குருகிலை கழுத்து
கூவிளம் கூந்தல் !!

தொண்டை தணக்கம்
கரங்கள் காயா
மணிக்கட்டு மரவம்
வேரல் விரல்கள் !!

அகங்கை அடும்பு
புறங்கை பிடவம்
கைநகம் கைதை
உந்தூழ் உடல் !!

தாமரை தேகம்
தேமாம்பூ தோள்
நெஞ்சு நாகப்பூ
மணிச்சிகை மார்பு !!

இலவம் இடை
முதுகு மருதம்
தோன்றித் தொடை
கால்கள் காழ்வை !!

கருங்குவளை கனுக்கால்
கால்விரல்கள் காஞ்சி
பாதம் பாலை
தளவம் தசை !!

குரல் குரவம்
பேச்சு போங்கம்
நடையிலே நரந்தம்
கரந்தை கண்ணியம் !!

மௌனத்திலே மௌவல்
கோங்கம் கோவம்
ஞானயத்திலே ஞாழல்
புன்னகையிலே புன்னை !!

வெட்கத்தில் வெட்சி
குணத்திலே குருக்கத்தி
பண்பிலே பாங்கர்
கருணையிலே காந்தள் !!

கொள்கையிலே கொன்றை
தூய்மையிலே தும்பை
வீரத்திலே வேங்கை
பாசத்திலே பகன்றை !!

மென்மையிலே அனிச்சம்
நம்பிக்கையில் நந்தி
அறிவியலிலே ஆத்தி
குறிஞ்சி குலத்தவளே !!

சேவைச் செம்மல்
திலக திருமங்கை
வாகைப் பூ சூடி
வாழையாகி குலம் காக்கும்
குலமகள்!!

--Sutha--

புரட்சி செய்..!! புரட்சி செய்..!!

அளவில்லா ஆற்றலுடையவள்
அஞ்சியதால் தானோ ? உனை
அழிக்கிறார்கள் கருவிலே
அறியாமையை நீக்கி !!

அணுவைப் போல பிளந்து
ஆற்றல் பிழம்பாகி
அந் நயவஞ்சகர்களை பொசுக்கி
ஆளுமை புரட்சி செய் !!

கருக்கலைப்பைக் கடந்தாலும்
கள்ளிப் பாலாபிசேகமிட்டு
கொல்லுகிறார்கள் உன்னோடு
குலத்தின் ஈராயிரம் சிசுவையும் !!

அறிவெனும் ஆயுதத்தை தீட்டி
அக்கயவர்களின் சிரத்தை சீவி
அறிஞர்களை மிஞ்சுமளவு ஆராய்ந்து
அறிவியலிலே புரட்சி செய் !!

கழிவாக கழிவறையிலும்
குப்பையாக குப்பையிலும்
கொன்று வீசுகிறார்கள் பிரம்மனின்
குழந்தை நீயென அறியாதோர்

உலகமில்லை நீயில்லையெனில்
உடைத்தெறி அடக்குமுறையை
உனக்கோர் பாதையில் அயராது
உழைத்து தொழில் புரட்சி செய் !!

மலர்ந்து மங்கையானதும்
மனித தசைத் தின்னிகள்
மலரின் கற்பை கொத்தி
மயானத்தில் புதைக்கிறார்கள் !!

நவீன கலையறிந்து அந்த
நச்சு நாகங்களை
நறுக்கி கழுகுக்கு கூறிட்டு
நல்லதொரு வீரப் புரட்சி செய் !!

வீட்டிலே அடிமையாக்கி
விலைப் பேசி விலங்கிட்டு
விடுதலையில்லா கைதியாக
விற்கிறார்கள் திருமணத்தில் !!

சிறைவாசியாகவே சாகாதே
சுயநலவாதிகளை சூறையிட்டு
சீறிப் பெண்ணடிமையை ஒழித்து
சுதந்திர புரட்சி செய் !!!

விதியினலே விதவையாகி
வாழ்வை இழந்தவளுக்கு
வீட்டிலே தினம் தினம்
வார்த்தையிலே கருமாதி

வண்ண பூந்தோட்டத்துக்கு
வெள்ளை உடையுடுத்தும்
கருப்பு சமூதாயத்தை தீயிட்டு
கொளுத்தி சமூதாய புரட்சி செய் !!

--தொடரும் --

--Sutha--

ஆதலால் காதல் செய்வீர் அன்னை மொழியை !!!

தமிழா நான் ..!!!

கல் தோன்றி மன் தோன்றாக் காலத்தே
முன் தோன்றிய மூத்த குடியில் பிறந்து
அகத்தியனின் ஞானம் பெற்று ..!!

பிள்ளைத்தமிழில் தாலாட்டி
அவ்வை மடியில் தவழ்ந்து
நெல்லியூட்டி வளர்த்தான் அதியமான் ..!!

முச்சங்கமிட்டு முக்கனி சுவையுடன்
மூதறிஞர்களால் முத்தமிழாக முடிச்சூடி
கரைபுரண்டேன் காவேரி அன்னையாக ..!!

மூவேந்தர்களின் வாளில் திலகமாகி
ஈழம் தொட்டு இமயத்தில் கொடிநாட்டி
வங்காளயெல்லை தாண்டியது வீரம் ..!!

திரிகடுகத்தில் தீரா நோய் தீர்த்து
கம்பரின் கற்பனைக்கு காதலியாகி
விடுதலை வேங்கையானேன் பாரதியால் ..!!

வீரமாமுனிவரால் பாரெங்கிலும் பவனிகொண்டு
வள்ளுவனால் உலகப் பொதுமறையாகி
வான் புகழ் அடைந்தேன் நேற்றுவரை..!!

தமிழா இன்று ..!!!

அலமாரியில் உறங்குகிறேன்
அரசியலுக்கு விளம்பரமாகி
ஊடகத்தில் கற்ப்பையிழக்கிறேன் ..!!

விதவையாக்கி விளையாடுகிறான் அந்நியன்
அனாதையாக மாண்டுபோகிறேன் வீதியிலே
ஈழத்தில் எம் மங்கையர் போல ..!!

தமிழா நாளை ..!!!

ஆங்கிலத்துடன் கலப்பு திருமணமாகும்
தமிழில் பேசினால் பரிசென்பார்கள்
அருங்காட்சியகத்திலே காட்சியளிப்பேன் ..!!

மலட்டு மொழியென பட்டம் பெற்று
தூசு படிந்து கரையானுக்கு இரையாவேன்
ஈழத்தில் எம்மினத்தைப் போல ..!!

நீ அன்னியமொழிக்கு அடிமையாகி
முகவரியிழந்து மூழ்கிவிடுவாய் இலமூரியாவாக
ஆதலால் காதல் செய்வீர் அன்னை மொழியை ..!!

இப்படிக்கு
தமிழ் மொழி

-- Sutha--

 

முப்பொழுதும் உன் கற்பனையில்..!!!

வேடனாக

பேச்சைப் பொறியாக்கி

பார்வையை வலையாக்கி

சிறு புன்னகையில்

சிறைப் பிடித்தாய் ...!!

கள்வனாக

கனவுக்குள் நுழைந்து

உள்ளத்தில் ஊஞ்சலாடி

இதயத்தைக் களவாடினாய் ...!!

நண்பனாக

நாளும் நகையாடி

அன்பில் அரவணைத்து

ஆட்கொண்டாய் ஆழ்மனதை ...!!

காதலனாகினாய்

தூக்கத்தை துறந்தேன்

வண்ணக் கனவுகளில் தினமும்

வாழ்ந்தேன் உன்னோடு ...!!

எதிரியாக

எனை நீங்கினாய்

இதயம் இடம்பெயர்ந்த சேதி

உன்னிடம் சொன்னதும் ...!!

கவிஞனாக

இன்று என்னுள் நுழைந்து

கற்பனையை எழுத்தாக்கி

கவி பாடவைத்தாய் ...!!

மன்னவனே

மதி வருவதற்குள்

மாலையிட நீ வருவாயென

முப்பொழுதும் உன்கற்பனையில் நான் ...!!

By Sutha